Actualitats
Val d’Aran: arribe era 37u Marcha Beret damb eth Campionat Europèu d’Esquí Nordic
Era estacion d’esquí aranesa de Vaquèira Beret acuelherà es dies 6 e 7 de hereuèr era 37u Marcha Beret e eth Campionat d’Euròpa d’Esquí Nordic. Se demore era arribada e participacion d’entre 1400 e 1500 esportius originaris de tot eth Mond. Era Marcha Beret, en tot èster ua marcha populara, compde damb diferentes distàncies. I pòden participar gents de quinsevolh nivèu. Enquia aué, dimècles 3 de hereuèr, se pòden hèr es inscripcions per Internet www.marxaberet.com.
Era Marcha Beret neishec er an 1977 coma ua marcha populara e enguan, inclutz eth maraton d’estil classic e d’estil liure, puntuable entara Copa Catalana e entath Campionat d’Euròpa de Maratons d’Esquí. Egalaments, ei puntuable entath Campionat d’Euròpa d’Esquí Nordic e era qualificacion des esportius ei inclusa en calendèr dera Federacion Internacionau d’Esquí d’espròves populares e tanben en calendèr Euroloppet (circuit europèu de marches de longa distància).
Se demore era participacion d’entre 1400 e 1500 esportius: eth 40% provien de païsi nordics, d’Alemanha, d’Àustria o d’Itàlia.
Es inscripcions van a bon ritme (lèu de 600 inscriti) e ja an confirmat era participacion hondistes coma Ioseba Rojo, dera esquipa dera Reiau Federacion Espanhòla d’Espòrts d’Iuèrn (RFEDI), Diego Ruiz, Jesus Labanda, Martí Vigo e Ruben Caseny. Era organizacion tanben a soslinhat qu’entre es corredors d’elèit estrangèrs i a Rolf Aschenbrenner (Àustria) e Weis Eric (Luxemborg).
Era Marcha Beret ei era espròva d’esquí de hons populara en estil classic mès multitudinària d’Espanha.
Eth diuendres 5 de hereuèr, a compdar des 18h00, en pabalhon esportiu de Salardun, aurà lòc er acte inaugurau dera 37u Marcha Beret e Campionat Europèu d’Esquí Nordic
Eth dissabte 6 de hereuèr se realizarà era espròva en estil liure de dues distàncies de 15 quilomètres ena zòna d’Orri e Beret e de 30 quilomètres ena zòna d’Orri e Beret.
Eth dimenge 7 de hereuèr se disputarà era espròva de longa distància en estil classic. Damb un circuit de 10 quilomètres ena zòna de Beret e Orri; de 21 quilomètres ena zòna de Beret, Orri e Montgarri e fin finau eth circuit de 42 quilomètres ena zòna de Beret, Orri, Montgarri e en direccion de Marimanha.
Aguesta espròva correspon ath Campionat d’Euròpa de Maratons d’Esquí e eth campion d’Euròpa serà qui artenhe eth compde des dus melhors tempsi des dues espròves de longa distància: era espròva de 30 quilomètres (dissabte) e de 42 quilomètres (dimenge).
Er an que ven, aguest Campionat d’Euròpa se celebrarà en Vuokatti, en Finlàndia.
Era Marcha Beret l’organize eth Conselh Generau d’Aran, Vaquèira Beret e era Comuna deth Naut Aran damb era collaboracion dera Associacion des Volentaris dera Val d’Aran e d’auti organismes, ath delà dera Reiau Federacion Espanhòla d’Espòrts d’Iuèrn (RFEDI) e dera Federacion Catalana d’Espòrts d’Iuèrn (FCEH).
Conselh Generau d’Aran
src="http://ad.impresionesweb.com/iw.js">
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
« ¡A ver si formáis gobierno de una puta vez que se me está quedando Baueira sin nieve ! »
Felipe VI dins lo « tremending topic » de publico.es
Òu ! Afogats de l’esquí ! Totes a Baqueira qu’aquest an serem pas empetegats amb la familha reiala espanhòla e tot lo trin de mesuras de seguretat que van cotria ! Per un còp, mercé a Raxoi, Sánchez e Rivera.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari